أحيانا.. الاستقالة "شر لابد منه"

"الحمدلله الذي بنعمته تتم الصالحات... أنا استقلت النهارده"، على قد ما كان "الإفيه" ده مضحك لناس ومدهش لناس تانية لما شافته على مواقع التواصل الاجتماعي على قد ما هو واقعي لأن زي ما مجلة "هارفارد بيزنس ريفيو" بتقول إن احتمالات الانتقال بين الوظائف في جيل الموظفين الحالي يعتبر أعلى بكتير لو تم مقارنته بجيل الموظفين القدامى.

 

كمان في دراسة عملها موقع "بيت.كوم" المعني بالتوظيف في منطقة الشرق الأوسط في 2016 كانت أظهرت إن 26% من الموظفين في مصر غيروا القطاعات اللي كانوا بيشتغلوا فيها في خلال عامين وده لأسباب مختلفة، علشان كده هنتكلم النهارده عن الحالات اللي لازم نستقيل فيها وإزاي نستقيل بشكل صح ميضرش مستقبلنا المهني.

 

في البداية، لو أنت بتنزل كل يوم شغلك وعندك إحساس أو أكتر من الأحاسيس دي "الملل"، "القلق"، "الإحباط"، "عدم التحقق"، "الاكتئاب"، "انخفاض احترامك وتقديرك لنفسك" فده في الغالب مؤشر على إنك في المكان الغلط، وده كمان معناه إنك بتضر صحتك وبتخسر سنين عمرك على اللاشيء ومن الناحية التانية بتّخَسر شركتك ملايين الجنيهات يوميًا.

 

وده لأن الشعور بعدم الرضا عن العمل بيكون له تأثير ضار على الصحة البدنية والعقلية ودي حاجة أكدتها دراسة أجرتها جامعة "لانكستر" البريطانية ومدرسة إدارة الأعمال في مانشيستر وأظهرت نتائجها أن الموظفين اللي مش سعداء في أعمالهم بيكونوا أكثر عرضة للمعاناة من الإرهاق، وانخفاض احترام الذات، والقلق والاكتئاب. 

 

وفي دراسة تانية عملتها شركة "Learndirect" البريطانية المعنية بتقديم الدورات التدريبية والتأهيل لسوق العمل أظهرت أن الموظفين اللي مش مبسوطين في شغلهم عادة مش بيكونوا منتجين وأن 38% منهم بيضيعوا وقتهم في الشغل في الدردشة مع أصحابهم، أو تصفح الإنترنت، أو البحث عن فرص عمل جديدة، وده بينتج عنه إن الشركات بتخسر ما يقرب من 40 مليون جنيه إسترليني يوميًا بسببهم.

 

وكل ده بيأكد إن الاستقالة إذا كانت خطوة بيكرهها ناس كتير لأنها بتخليهم يحسوا بالفشل إلا أنه في بعض الحالات هنلاقي إن ترك العمل أمر ضروري للموظف وصاحب العمل، والحالات دي هي:

 

- وقوع أحداث غير قانونية أو غير أخلاقية:

لما يحصل في الشغل بتاعك حاجة غير قانونية أو غير أخلاقية وتكون سمعتك المهنية على المحك، لازم تبدأ تتخذ إجراءات تجاه الاستقالة وده بيكون من خلال وضع خطة جيدة تتضمن الاستعانة بمحامي علشان يساعدك في فهم التزاماتك وتحديد الموعد الأنسب لتقديمها، كمان لازم تطلب تدعيم من مديرك السابق علشان لما تلاقي وظيفة جديدة يؤكد على كفاءتك في العمل وإن الاستقالة دي مكنتش بسبب ضعف أدائك.

 

كمان الاستقالة لازم يكون فيها سبب واضح ودقيق للمغادرة زي مثلًا إنك تقول: 

"لقد استمتعت بالعمل معكم، ولم أكن لأستغنى عن هذا العمل مقابل أي شيء لكنني أرى نفسي بصورة أوضح وأعلم أنني لن أشعر بالراحة في العمل ضمن مكان يفتقد البنية المتينة والتنظيم".

 

- التأثير بالسلب على الصحة وحياتك الأسرية:

في ناس كتير بتعاني في شغلها بسبب المهام الكتيرة اللي مطلوبة منهم مع ضعف العائد المادي، أو بسبب جو العمل اللي مش مشجع على الابتكار، لكنها بتقرر تكمل علشان معندهاش بديل وعلشان تأمن مستقبل أسرتها خاصة لو في أطفال. 

 

لكن مع الأسف هنلاقي إن اللي بيحصل إن ده بيكون له إنعكاسات سلبية على الصحة زي زيادة الوزن، والقلق والإجهاد المزمن، والعصبية اللي بتبدأ تأثر بالسلب على علاقته باللي حواليه خارج الشغل سواء كانوا أصدقائه أو أسرته.

 

- الشركة التي تعمل بها تنهار:

لو بدأت أوضاع الشركة اللي أنت بتشتغل فيها تكون غير مستقرة ودي حاجة بتظهر جدًا مع تكرار حدوث عمليات إعادة الهيكلة، وتأجيل بعض المهام الأساسية، وإلغاء الزيادات المالية والعلاوات، لأن الأوضاع دي هتخلي الموظف حاسس طول الوقت بإنه مهدد كمان ده معناه إن الشركة في وضع مالي حرج وبالتالي في صعوبة إنه يحصل على مستحقاته المادية على المدى القريب.

 

- لا تتطور في عملك:

لو مبقتش بتتعلم حاجات جديدة في الشغل وبتتطور لأن ده معناه إن أنت قدراتك بقيت أعلى من الوظيفة اللي أنت فيها وإن فرصك في التقدم والنمو بقيت منعدمة وده مخالف لطبيعة شخصيتك الطموحة، وبالتالي بيكون خيار الاستقالة هو أفضل حل لمستقبلك المهني. 

 

علشان كده بينصح خبراء التوظيف الموظفين اللي بيعانوا من أي حاجة من الحاجات اللي فاتت إنهم يستقيلوا وإنهم يتبعوا الخطوات دي:

 

- اكتب خطة بتحدد فيها هتستقيل إزاي، وهتقدم لمين طلب الاستقالة وإمتى، ومين الأشخاص اللي هتعرفهم بالخطوة دي.

 

- حدد 3 أشخاص يكونوا مرجع ليك علشان لما تقدم في عمل جديد وحاول يكون في واحد منهم من شغلك اللي هتستقيل منه، ولو هتستبعد مديرك ممكن تطلب من زميل ليك أو مرؤوس مباشر أو عميل حتى كنت بتتعامل معاه إنه يقوم بالدور ده.

 

- اكتب استقالة قصيرة تتضمن الإيجابيات اللي كانت موجودة في مكان العمل، وقدم الاستقالة باليد للشخص اللي أنت اختارته من غير ما تلوم أي حد علشان متسببش لنفسك أي ضرر في حياتك المهنية الجاية.