أسباب فشل الشركات الناشئة - ج (1)

فيه شخص أعرفه قعد في الخليج فترة كبيرة من حياته ورجع مصر وهو معاه حوالي مليون جنيه جمعهم بالتعب والمجهود والكفاح ولما نزل مصرعمل مشروع ب100 ألف جنيه وكان حريص فيه جداً والمشروع نجح بشكل رائع وعمله أرباح كبيرة فقرر يفتح مشروع تاني حط فيه كل الفلوس وكان مشروع فكرته ودراسة الجدوى بتاعته أفضل من الأولانى وبذل فيه مجهود أكبر بكتير من الأول ومع ذلك المشروع فشل بشكل كبير جداً وخلاه يقرب يفلس ويدخل السجن لولا ستر ربنا وقفله والحمد لله قدر بعد كده يقف علي رجليه ويبقي أفضل من الأول

ولأني كنت قريب منه جداً طول الفترة دي كان وجهة نظرى إنه لما كان فاتح ب10% من رأس ماله كانت أعصابه هادية جداً ومكنش متوتر وكان بياخد القرارات بشكل عقلاني مش تحت تأثير ضغط علشان كده كان معظمها بيبقى صحيح

علشان كده بنصح أى حد بيبدأ مشروع جديد إنه يبعد عن أى قرض من أى نوع وميكونش الفلوس دى مثلاً هى فلوس تقاعد أو فلوس جايه ومعاها توتر كبير لأنها في النهاية هتخليه يفشل نتيجة إنه بيحط نفسه تحت ضغط كبير وبياخد قرارات غلط .

أى مشروع يا جماعة عامل زى الطفل اللى بيتولد صغير ويكبر مينفعش يجيلك طفل وتقوله انت بقى مسئول عن نفسك ومش هصرف عليك إنت بقى تكفى نفسك وكمان ممكن تصرف علينا لو فاض منك فلوس

فيه أسباب كتير جداً إن الشركات الناشئة تفشل بس مفيش سبب أكتر من إنك تبدأ مشروعك بدين وكمان لو مثلا لبنك اللى هو لو المشروع فشل لاقدر الله أنا مش بس هقفله لأ وكمان هتسجن ده بيضاعف احتمالات فشلك وخسارتك لحلمك ومجهودك وفلوسك.

لو معكش فلوس دخل شريك ولو ملقتش شريك ابدأ علي قدك ولو مش هينفع بلاش تفتح خالص واحتفظ بفرصك لبعدين لما تبقي جاهز لأن أى تجربة هتدخلها وانت مش جاهز غالباً بتفشل وهتتحسب عليك تجربة وانت مش هتبقي انت بعدها لأ هتتغير وغالبا للأسوأ مش للأفضل .

هتبقي جبان وحاسس بالفشل ومعندكش ثقة بنفسك رغم إنك كويس وممكن تنجح بس انت مخدتش معاك أسباب النجاح وأولها إنك ما تحطش نفسك تحت ضغط

أسباب فشل الشركات الناشئة كتير وأهمها هي إنك تدخل مشروع أكبر من حجمك أو إنك تبدأ بتهديد وتحت ضغط نفسي