بنقابل كتير من الـ Team leaders في مجالات مختلفة بيكونوا شاطرين جداً ولكن ماعندهمش المهارات إللي المفروض تكون موجودة في قائد فريق العمل، علشان كده قررنا إننا نوضح أهم المهارات إللي المفروض تكون موجودة عند أي قائد فريق عمل سواء كانت أول مرة أو بقاله فترة.

1- التواصل.

من أهم المهارات إللي المفروض تكون عند أي قائد هي إنك تكون بتقدر تتواصل بشكل جيد مع أي حد شخص في الشركة، سواء كانوا الأشخاص دول من التييم بتاعك أو من الإدارة، ولازم التواصل يكون بشكل لائق ومافيهوش تجريح لأي شخص.

2- محفز.

أي قائد لازم يكون "محفز" للموظفين اللى بيشتغلوا معاه، ما ينفعش تكون مصدر للطاقة السلبية، لإنك كل ما بتحفزهم بشكل إيجابي هتلاقي أفضل النتائج، ولو انت قائد "غير محفز" مش هيحبوا يشتغلوا معاك من الأساس، والشغل هتكون جودته قليلة.

3- التفويض.

في نوع من القادة بيفضلوا يعملو أغلب المهام الوظيفية بنفسهم طول الوقت من غير ما يدربوا الموظفين أو ينقلوا لهم جزء من الشغل ده إعتقاداً منهم ان ده هيخلى الإدارة تتخلى عنه في أي وقت لكن العكس هو الصحيح وجود فريق عمل قادر ييشغل فى أى وقت وتحت أى ظروف ده شئ يحسب لك كقائد للفريق.

4- تحمل المسؤولية.

لازم تكون شخص مسئول عن أي حاجة تحصل في الشغل، سواء بالنجاح أو الفشل، ماينفعش لو حصل عندك أي مشكلة تشيل إيدك منها وتقول مش مسئوليتي وتشيلها لأي حد، لازم تتحمل المسؤولية في كل الحالات.

5- شخص ملتزم.

كونك قائد فأنت بالتالي بتكون مثل أعلى للتيم بتاعك، علشان كده مهم جداً إنك تكون شخص ملتزم في أي كلمة بتقولها، علشان الموظفين يكونوا ملتزمين هما كمان.

6- الوعي الذاتي.

لازم تكون عارف إيه هي نقاط قوتك وإيه هي نقاط ضعفك، علشان تعرف كويس ازاي تحسن نفسك من وقت للتاني، وتحول نقاط الضعف دي لقوة.

7- محبوب.

لازم تكون قائد محبوب بين الموظفين، صاحب الموظفين بتوعك، ما تتكبرش عليهم أو تحسسهم ان فى حاجز بينك وبينهم، كل ما كانت العلاقة بينك وبينهم كويسة هيحبوا الشغل وهيأدوا بشكل كويس.

8- التحكم العاطفي.

لازم تكون بتعرف تتحكم في مشاعرك كويس جداً، ومافيش حاجة بتأثر عليك بالساهل، علشان ماتخدش قرارات بناءً على عاطفتك لأن غالباً القرارات دي هاتكون نتيجتها سيئة.

9-. بناء العلاقات.

كونك قائد مهم جداً انك تبني علاقات مع ناس كتير خاصة في مكان العمل، لأن معروف إن بناء شبكة من الأشخاص المهمين هايكون عامل مساعد لنجاحك على المدى الطويل.

10- حل المشكلات.

المسؤولية الأساسية لأي قائد هي حل جميع المشاكل اللي ممكن يقابلها، ماينفعش تكون قائد وما يكونش عندك القدرة على حل المشاكل.