إزاي تعمل Buyer Persona بأسهل الطرق!

لما بيتقدم عريس لبنتك أو أختك، أول رد بتقولهوله هنسأل عليك وبعدين نجيب لك الرد، جملة بسيطة لكن وراها كام كبير من الجهد اللي هيتبذل، بداية من إنك هتعرف كل حاجة عنه بداية من سنه ودخله واهتماماته وطريقة حياته وصولًا لمستوى دخله وطبقته الاجتماعية ووظيفته وغيرها من العناصر  المهمة بالنسبة لبنتك وليك.

"بنسأل على فلان"

 بالنسبة لنا هي مهمة عادية بتتطبق طبقًا للعرف، لكن فى مجال الميديا والتسويق فهى واحدة من أهم الخطوات اللى بنعلمها لفهم العميل المستهدف وإقناعه بالمنتج. العملية دي اسمها الـ buyer persona أو بالعربي شخصية المشترى.

شرح buyer persona وأهميتها

في سنة من السنين جالنا عميل يتعاقد معانا علشان نكون احنا المسئولين عن إدارة صفحات السوشيال ميديا الخاصة بمشروعه، في أول اجتماع بينا وبينه طلبنا منه Brief عن المجال بتاعه ومين اللى عايز يستهدفهم، وكانت الإجابة متوقعة وهي أنا عايز استهدف الناس كلها!!

وقتها ما استغربناش لإن تقريبا ده طلب كل العملاء ووقتها قررنا نفهمه ونقنعه إن مفيش حاجة إسمها كده، ما ينفعش نستهدف كل العملاء الموجودين على السوشيال ميديا بمعنى انه ما ينفعش محل حلويات يستهدف الناس الرياضية إللي بتحافظ على وزنها أو هدفها هو الحصول علي جسم رياضى. طبعاً هو ما قدرش يفهم بنسبة 100% ولكن فهمناه اننا علشان نشتغل صح بنحتاج نحدد شخصة العملاء المستهدفين وده أسمه فى التسويق  Buyer Persona ودى هتساعدنا فى:

1- إستهداف العملاء المهتمين بالمنتج بتاعك.

2- تقديم محتوى يناسب شخصية العملاء المستهدفين. 

3- وصول الإعلانات الخاصة بالمنتج للعملاء المهتمين.

بعد الإجتماع ده بقينا متأكدين ان الـ Clients عمرهم ما هيفهمونا بالشكل الصح لكن قررنا نوضح لكل مبتدأ أو صاحب بيزنس هيعتمد علي نفسه ازاي يعمل Buyer Persona؟

ازاي تعمل buyer persona ؟

الـ Buyer Persona أو شخصية المشتري بنحددها بناءاَ مجموعة صفات خاصة بالمستهلكين وعلشان اعمل Buyer Persona لازم اتبع مجموعة من الخطوات:

1- السن : بتحدد فيها سن الفئة العمرية للعملاء المستهدفين.

2- المكان : بتحدد إيه هي الأماكن المتواجد فيها العملاء المستهدفين وعايشين فين

3- الاهتمامات: بتحدد فيها ايه الحاجات إللي بيهتموا بيها.

4- اللغة : بتحدد إيه هي اللغة إللي بيتكلم بيها العملاء بتوعك.

5- النوع: بتحدد هل العملاء المستهدفين من الرجال أو البنات ولا الاتنين.

6-التعليم: بتحدد إيه هو المستوى التعليمي للعملاء؟ هل طلبة أم جامعيين ولا متخرجين.

7- العلاقة : هل متزوج أو أعزب.

8- نسبة الدخل : بتحدد مستوى الدخل.

9- الوظيفة : بتحدد فيها المجال إللي شغال فيه

11- المواقع المفضلة : بتحدد فيها أكتر المواقع الإلكترونية إللي بيزورها.

12- التحديات : بتحدد فيها إيه إللي ممكن يكون سبب إنه مايشتريش المنتج بتاعك.

13- دافع الشراء: بتحدد فيها ليه العميل هايشتري المنتج أو الخدمة إللي بتقدمها انت بالذات.

14-السلوك : بتحدد فيها العملاء بتوعك بيقضوا وقتهم أونلاين إزاي ؟ وإيه هي أكتر مواقع السوشيال ميديا إللي بيستخدموها.

في حاجة محتاجين نوضحها إن مش شرط تعمل Buyer Persona لشخص واحد بس لأ انت تقدر تعمل ل أكتر من شخص وده الصح لإنك غالباً بتسهدف أكتر من فئة مثلاً لو بتستهدف الطلبة والمتخرجين فأكيد كل واحد منهم بيكون ليه اهتماماته أهداف مختلفة عن التاني.

طب السؤال المهم هو أنا إزاى أوصل للمعلومات دي؟ في أدوات هتساعدك إنك توصل للمعلومات دي وكمان بالأرقام زي :

1- Facebook Audience Insights

2- Google Analytics

الـ buyer persona مهمة جدًا فى فهم الجمهور المستهدف من نشاطك بالإضافة إلى إنها بتخلى جهودك التسويقية مبنية على أساس سليم. لو حبيت تعرف أكتر عنها وعن أزاى توظف طرق استهدافك لجمهورك صح، انصحك بكورس استراتيجيات السوشيال ميديا من هنا.