أوقات كتير بيحصل حاجات مثيرة للجدل على مواقع التواصل الإجتماعى أو فى برامج التلفزيون بتخلى الناس كلها تتكلم عنها لدرجة انها بتوصل لتريند على مواقع السوشيال ميديا وبيوصل الأمر إننا بنلاقي بعض البرندات استخدمت الحدث ده كأسلوب للدعاية عن منتجها.

تعريف الـ News Jacking :
إنك تستغل حدث يكون Trending وتربطه بالمنتج بتاعك وتسوق لنفسك من خلال الحدث ده، ولكن مع مراعاة إن استغلالك للحدث ده لازم يكون بشكل سريع وتكون من أوائل البرندات اللي اتكلمت عنه.

أهمية استخدام الـ News Jacking ؟
هيساعدك في إن الناس تعرفك، وهيزود التفاعل على صفحتك، وناس كتير جداً هاتتكلم عن البراند بتاعك، وهايحسوا إنك واحد منهم وبتهتم بنفس إللي هما بيهتموا بيه، لكن خلى بالك لو استخدمته بطريقة غلط هيلبسك في الحيط، والدليل على كده إن في برندات كتير استخدموا ال News Jacking بطريقة غلط وأثر عليهم بالسلب ياترى زى مين؟!

- أمثلة من البراندات اللي استخدموا ال News Jacking بطريقة صح:
1- Dunkin’s Donuts

في سنة 2015 ظهرت صورة لفستان على جميع مواقع التواصل الإجتماعي والناس قعدت تسأل عن لون الفستان؟ وماحدش كان متأكد هو الفستان ده لونه أبيض ولا أزرق ولا دهبي ولا أسود؟

برندات كتير أوي استغلت الحدث ده ولكن كان أكتر براند مؤثر في استخدامه للـ News Jacking هو دانكن دونتس، نشر صورة فيها قطعتين دونتس، واحدة باللون الأزرق والتانية بالأبيض وكتب على الصورة

" مش مهم لونها أزرق ولا أبيض ولا دهبي، المهم إن طعمها لذيذ!

التويت دي حصلت على أكتر من 3000 ريتويت، بالإضافة للـ Engagements اللي حصل من ال Users.

2- snickers chocolate

في كأس العالم 2014 قام اللاعب الأوروجواياني لويس سواريز بـ "عض " مدافع إيطاليا جورجيو كيليني، وزي أي حدث رياضي مثير للجدل سواريز بقى تريند على كل مواقع التواصل الاجتماعي، واستغلت كتير من البرندات الحدث ده لكن من أظرف البرندات إللي استخدمت ال News Jacking في الحدث ده " سنيكرز ".

سنيكرز وجهت رسالة ل سواريز وقالتله '' المرة القادمة لو جعان خدلك حتة من ال سنيكرز" الـ Tweet دي التفاعل معاها كان عالي جداً، ووصل عدد مرات إعادة التغريد لأكتر من 44 ألف شخص بالإضافة لزيادة عدد المتابعين للحساب بشكل كبير.
كل البرندات إللي إحنا ذكرناها دي قدرت إنها تستخدم الـ News Jacking بطريقة صح،
ولكن في برندات تانية استخدمت الـ News Jacking بطريقة غلط، وكانت النتيجة سلبية زي مثلا:

3- الطيران الهولندي

في نهائيات كأس العالم 2014 بعد خروج المكسيك، نشرت الخطوط الجوية الهولندية تويت عبارة عن "وداعاً يا أصدقاء " مشيراً إلى خروج المكسيك من كأس العالم، حصل جدل كبير جداً بسبب التويت دي، وبعض الناس دعوا لمقاطعتها ومن ضمنهم شخصيات رسمية.

في النهاية نحب نوضح ان ال News Jacking سلاح ذو حدين، من الممكن جداً يكون مفيد للبراند بتاعك ويساعد على زيادة التفاعل وممكن لا، لإنك لو استخدمته بطريقة غلط الناس هتتفاعل معاك بطريقة سلبية وممكن يحصل للبراند بتاعك Brand attack وعلشان تستخدم الـ News Jacking فى قواعد معينة لازم تتبعها أهمها انك تبعد عن الأحداث الغير الاخلاقية والأحداث السياسية والدينية والعنصرية، علشان ماتفقدش فئة كبيرة من متابعينك وتخسر عملاء محتملين.