المقال ده موجه للناس اللي بتنفذ توصياتنا وكل شوية بيسألوني على الدولار والذهب فقلت أرد على الكل في مقال واحد

- إحنا الحمد لله وصينا شراء للذهب يوم 31 أكتوبر 2016 وكان سعره 258 ج لعيار 21 وبعدين رجعنا وصينا علي الشراء تاني يوم 23 ابريل 2016 لما كان سعره 365 ج ودلوقتي السعر حوالي 500 وده وقت نقدر نقول إننا لازم نبيع علشان نحقق المكسب واللي هيبيع دلوقتي هينتظر يشتري تاني عند مستوى 430-450 ج

- النقطة المهمة في الإستثمار في الدهب هو سعر الدولار اللي بيأثر فيه مع تأثير إنه بيطلع عالمياً فدلوقتي لو سعر الدولار نزل محلياً يبقى سعر الدهب هينزل خلال الأسبوعين الجايين وعالميا الدهب عنده تصحيح قوي يعني هاينزل برضه

- سعر الدولار أنا شايف إنه هينزل لمستوى ال 11 ج وال 12 لعدة أسباب :

أولاً إن التحليل الفني والمالي بيقول كده .

ثانياً إن الصعود الأخير كان نتيجة مضاربة على الدولار مش نتيجة عرض وطلب .

ثالثا إن فيه ناس كتير هتبدأ تبيع لأن السعر دلوقتي مغري جداً .

رابعاً إن التقييم العادل لسعر الجنيه أمام الدولار حوالي 11.6 فحتى لو صعد تحت تأثر المضاربة لازم يرجع لأصله

- طبعاً أنا بأكد على مجموعة نقط :

- أولاً رأيي ده نتيجة تحليل علمي مش بناء علي رؤية شخصية .

- ثانياً رأيي غير ملزم لأي حد يعني اللي شايف إن الدولار هيصعد ومُصر إنه يشتري في القمة دلوقتي محدش هيمنعه.

- ثالثاً رأيي منفصل تماماً عن أي إنحياز سياسي

- رابعاً أنا كتبت رأيي نتيجة لسيل الأسئلة على الخاص اللي مش هنفع أرد عليهم واحد واحد .

- خامساً أنا بقول رأيي لأني قلقان على ناس كتير بتندفع للشراء مع الهوجه ودول هيخسروا كتير لأن سعر الصرف ممكن يستقر على مستوى ال 11 لمدة سنة أو أكتر وده شفناه من 18 سنة لما الدولار طلع من 3.4 ل 6.5 وبعدين نزل واستقر عند 5.5 حوالي 10 سنين طبعاً دلوقتى غير زمان لأن التغييرات السياسية والإقتصادية دلوقتي أكبر وزي ما قلت في البداية ده رأي غير ملزم لحد ولكن نصيحه لوجه الله

- أتمني إننا ما نستعجلش ولا نندفع لأننا كمصريين لينا سوابق في الموضوع ده من أيام الدينار العراقي والناس بترجع تزعل وتندم .

ربنا يوفق الجميع ويرزقنا بالحلال