في أوقات بتيجي علينا بنحس أن أحنا ورانا كمية شغل مفيش أمل أنها تخلص لدرجة أن ما بنقدرش نحدد نعمل أيه ولا أيه، فبنبتدي نوقع شغل ونغلط في الشغل اللي بدوره ممكن يتسبب في خسارة شغلنا على الرغم من أنه كان من الممكن أن الشغل ده كان ممكن يتعمل في وقت أقل من الوقت اللي كنا محددينه فتعالوا نشوف طريقة من الطرق اللي عملت ثورة في التفكير في مجالات كتير مختلفة سواء بيزنس أو غيرة.

إزاي تنظم أفكارك
طلعت حلول كتير لموضوع التنظيم والتفكير ففي ناس قالوا نعمل قائمة بالأعمال اللي ممكن نعملها وناس قالو نعمل قائمة بالتصرفات اللي نبعد عنها عشان منتعطلش وناس قالو ممكن نستخدم أي تطبيق لإدارة الوقت بس في ناس بقى مبدعين قالوا الحل هو أننا نرسم، طبعاً ناس كتير ممكن تستغرب يعني أيه نرسم عشان نضبط وقتنا وننظم أفكارنا.

الموضوع بكل بساطة مقسوم لجزئين
نظرية بتقول أن المخ مقسوم لجزئيين نص يمين ونص شمال اليمين بيكون هو المسئول عن المهام الإبداعية والتعبيرية، وقدرات التعرف على الوجوه والتعبير عن المشاعر والاستمتاع بالموسيقى وفهم وإدراك المشاعر وتمييز الألوان واستيعاب الصور.

ونص شمال مهمته هي المنطق في التفكير واستيعاب اللغة والتفكير التحليلي، مع العلم أن التقسيمة دي في أقوال كتير حوليها وأراء مختلفة بس بنعتبرها منطقية لأنها بسببها خرج لينا علم جديد اسمه التفكير الإبداعي، وللي ميعرفش التفكير الإبداعي هو عبارة عن التفكير من خلال الخروج عن كل القواعد والمعوقات الفكرية للوصول لحلول مبتكرة للمشاكل أو المواقف اللي بتواجهنا في حياتنا من خلال استخدام أساليب جديدة ومبدعة.

ايه هي الخرائط الذهنية
الخرائط الذهنية هي عبارة عن وسيلة للتعبير عن الأفكار من خلال الرسومات والصور، فبيقوم الشخص بكتابة ورسم الأفكار على ورقة وبيركز عليها، ومن خلال الرسمة دي بيتم استخدام الذاكرة البصرية في اكتشاف أفكار جديدة وكمان بيفتكر حاجات تانيه كانت في دماغه واللي بيحصل هنا هو عملية بتستخدم جزئيين المخ في نفس الوقت فالجزء الشمال بيكتب ويحدد المعلومات والجزء اليمين بيدخل المعلومات دي على شكل خريطة وصور.

والخرائط الذهنية ليها استخدامات كتير فممكن تستخدمها في كتابة المقالات أو تنظيم البيت أو تنظيم وقتك في الشغل أو في حل مشاكلك في الشغل أو في أنك تطور نفسك، وده لأن قوة الخرائط الذهنية الحقيقة متمثلة في أنها بتديلك نظرة أكثر شمولية للموضوع.

كيفية استخدام الخرايط الذهنية في خطوات محددة:

1. حدد الفكرة المركزية: الفكرة المركزية هي نقطة البداية في الخريطة الذهنية اللي بتعملها فمثلاً لو طبقنا في البيزنس وقلنا أن اللي بيحضر الخريطة دي واحد صاحب بيزنس وبيعاني من مشكلة في التسويق فالفكرة المركزية هنا "التسويق السيئ".

2. أعمل أفرع رئيسية من الفكرة المركزية: بعد ما بتحدد الفكرة المركزية في شكل رسمة طلع منها مجموعة من الأفرع الرئيسية فمثلاً مثال التسويق السيئ الأفرع الرئيسية اللي هتطلع منه هتكون زي الميزانية الضعيفة وفرع تاني بيقول أن الخطة التسويقية مش فعالة وفرع تالت بيقول أن محدش بيهتم بالدعاية أصلاً وبعد ما تخلص الأفرع الرئيسية بتطلع أفرع فرعية تانيه من كل فرع رئيسي بتكتب أيه الحلول المقترحة، فمثلاً لو على ضعف الميزانية ممكن حلولها تكون أدوات تسويق منخفضة التكلفة زي الأيميلات أو كتابة المقالات على منصات التدوين أو رسائل الsms أو حملات على منصات التواصل بميزانيات متوسطة أو مسابقات على صفحة الفيس بوك وهكذا.

3. أستخدم كلمات صغيرة: راعى وأنت بتعمل خريطة ذهنية أن تكون الكلمات اللي بتكتبها في الفروع بسيطة وسهلة عشان تقدر تستوعبها ومفيش مشكلة لو عدد الفروع زاد.

4. أستخدم الألوان: وانتب تكتب الأفرع الرئيسية خلي كل فرع منهم بلون عشان تقدر تفرق ما بينهم وخي الأفرع الفرعية اللي بتطلع منهم تكون بنفس لون الأفرع الرئيسية.

5. في النهاية: صيغ الأفكار اللي طلعت بيها من الخريطة الذهنية اللي صممتها لجمل طويلة تفصيلية عشان تقدر تحدد خطواتك الجايه إيه.

طبعاً الموضوع موقفش لحد هنا لأ ده بقى كمان فيه أدوات أونلاين تقدر تستخدمها عشان تعملا خرايط ذهنية بشكل منظف من غير الألوان والورق ومنها.

موقع mindmup : https://goo.gl/85vR2k

موقع buuble.us: https://goo.gl/vC9WX

تطبيق google للخرايط الذهنية : https://goo.gl/DyZlY

وفي تطبيقات كتير تقدر تستخدمها عشان تعمل خرائط ذهنية تساعدك في شغلك أو في حياتك عموماً.