رسالة من الانبوكس:

اشتغلت لصالح مؤسسة كبيرة لمدة 20 سنة، ولما جه وقت إعادة هيكلة وتنظيم فريق العمل، اتخلوا عني ومشوني من الشغل!!

عمري ما توقعت أبدا إني أخسر شغلي، الموضوع ده سببلي أزمة كبيرة فعلا، قعدت من غير شغل حوالي 6 شهور، بعدها بدأت شغل جديد استمريت فيه سنتين، لكن الشركة كانت خاصة، فلما صاحبها كبر في السن وساب الشركة لابنه، قام باع الشركة، وبقيت عاطلة عن العمل ورجعت من تاني أدور على شغل.

مشكلتي الأساسية إني عايزه شغل مستقر، إزاي ألاقي شغل فيه نسبة عالية من "الأمان الوظيفي"؟

الرد:

لو كان الموضوع بإيدي كنت هرشحك لشغل مضمون إنك تفضلي فيه لمدة 25 أو 30 سنة قدام، بس للأسف مافيش وجود للشغل ده، إنت مريتي بتجربة صعبة اتعلمتي منها إن شغل الحكومة المضمون - حسب تفكيرنا التقليدي- ماطلعش مضمون، وما بقاش يفرق كتير عن الشغل الخاص.

بالإضافة لأن قبول شغل معين اعتمادا على اعتقادنا إن فيه نسبة أمان كبيرة، ده قرار خطير جدا، لأنه غالبا الوظايف اللي بنربطها بمستوى "أمان وظيفي" عالي، بتكون أقل الوظايف فائدة في تأهيلنا للتعامل مع الواقع الجديد في سوق العمل، الواقع إلي بقول: كلنا دلوقتي عبارة عن رواد أعمال.

خليني أقولك على سر تحقيق "الأمان الوظيفي" في 2018: إننا إحنا اللي بنبني الأمان الخاص بينا، وبنتحرك بيه خلال مسيرتنا المهنية، مفيش صاحب شغل ممكن يضمنلك وظيفة مدى الحياة، سواء كان شغل حكومة أو قطاع خاص.

عشان كده الأولوية بالنسبة ليكي دلوقتي لازم تكون -وبالنسبة لينا كلنا كمان-إننا نخلي عندنا مزايا ومؤهلات تخلينا "قابلين للتوظيف" بسهولة أكبر، يعني ضاع مننا شغل، بسهولة نلاقي شغل تاني.. إزاي ده هيحصل؟ هيحصل عشان هنبقى عارفين السوق كويس، وكمان الناس الفعالة في السوق هتبقى عارفانا.

وعشان تحققي ده وبالتالي تحققي لنفسك "الأمان الوظيفي" الخاص بيكي، لازم تنفذي الـ10 نصائح دول:

1- ماتفكريش في نفسك على إنك باكيدج مكونة من شهادات وسنين خبرة، حاولي زي أي محترف في مجاله إنك تتعرفي على مشكلة مطلوب علاجها عند العملاء- كل واحد حسب مجاله وتخصصه- اتعرفي على المشكلة ديه كويس والأهم من ده توصلي لطريقة علاجها أو تخفيفها على الأقل.

2- خليكي متابعة كويس السوق، عشان تفهمي كويس إزاي المشكلة ديه بتتطور وبتتغير مع الوقت، لأنك طول ما إنتي بعيدة عن العالم إللي بره كل ما هيبقى صعب تبقي قريبة من السوق ومن إنك تركزي على المشكلة وطريقة علاجها.

3- اعرفي قيمتك الحقيقية، غلط الطريقة اللي بنعملها لما بنقدم على شغل جديد ونقول آخر مرتب خدته كان كذا، المفروض إننا في أي فرصة شغل جديد مانتكلمش على دخلنا القديم، الصح إننا نعرض إمكانياتنا ومهاراتنا، ونوضح قدرتنا على التعامل مع المشكلات والتحديات في الشغل، ونوضح هنفيد الشغل الجديد ده في إيه، وده إلي يحدد مرتبي الجديد.

4-راقبي باستمرار السوق، وشوفي امتى ممكن يظهر احتياج للمجال اللي بتشتغلي فيه، اعملي ده حتى لو عندك شغل دلوقتي ومبسوطة فيه، عشان تقدري تتصرفي بسرعة في أي لحظة تبقي فيها من غير شغل.

5-طوري مهاراتك باستمرار عشان تواكبي احتياجات السوق، سواء بقى كان شغلك بيدعمك في ده أو لأ، لازم دائما تتطوري وتتعلمي الجديد في مجالك.

6- أسسي شبكة علاقات كويسه على المستوى المهني والشخصي كمان، وحافظي باستمرار على التواصل معاهم.

7- اتقني مهارة أو حاجة في شغلك ماحدش غيرك بيعملها، لازم تكوني متميزة قوي في حاجة محددة، مهما كنتي شاطرة في حاجات تانية.

8- بعد ما تحققي كل النقط اللي فاتت، ومع سنوات شغلك الطويلة، هتبقي عرفتي قيمتك الحقيقية في السوق، وهتبقي حطيتي إيدك على مشكلة أساسية في السوق وبدأتي تفكري في حلول ليها، يعني تقدري تعتبري نفسك "استشارية" في مجالك، سواء كان بدوام جزئي أو كامل، سواء في الوقت إلي بتدوري فيه على شغل أو بشكل عام.

مهم جدا تعرضي نفسك في أي وظيفة بلقب استشارية، أفضل من باحثة عن عمل.

9- مع نمو مهاراتك هتبقي معروفة في السوق وهتطلبي في مهام متفرقة، وتدريجيا هتوسع دايرة الناس إلي تعرفك، وده هيساعدك تحافظي أكتر على شبكة علاقاتك.

مش هتحسي بالقلق لو قعدتي كام شهر من غير شغل، لأن المهام المتفرقة ديه مع خبرتك الكبيرة هوفرلك فلوس كويسة.

10- في النهاية هتوصلي لنقطة هل أنا محتاجة أشتغل الشهر ده ولا لأ، وهي ديه حالة السكينة المطلوبة وإلي بنسعى في الأساس للأمان الوظيفي عشان نوصلها.

انسى قصة الأمان الوظيفي، وابني بنفسك نوع الأمان اللي ماحدش ممكن يأخذه منك.

أتمنى لك كل الخير، وبالتوفيق