لو انت موظف مجتهد، ملتزم بمواعيدك، علاقتك كويسة بزملائك في الشغل، لكن مش قادر تقدم نفسك وأفكارك بطريقة مقنعة، يبقى لسه قدامك شوية عشان تقول على نفسك ناجح، مهم جداً انك تتقن مهارة الاقناع، سواء عشان تقدر تقنع مديرك بشغلك وأفكارك، أو عشان تقنع العملاء الي بتتعامل معاهم بمنتج شركتك.

اتقانك لمهارة الاقناع يعني اتقانك لفن "الإبهار"، يعني تبقى انت الشخصية الجذابة في مكان شغلك، وعلى عكس ماكتير من الناس تعتقد، اتقان مهارة الاقناع مش صعب، القصة بس انك تطبق النصايح الي هنقولهالك وتتدرب عليها كويس:

- من أهم آليات اتقان مهارة الاقناع انك تكون مقتنع ومصدق اللي بتقوله، وخليك واثق في نفسك عشان تقدر تتكلم بثقة وتعبر عن أفكارك بتلقائية من غير ما تكون حافظ أو كاتب كلامك في ورقة.

- مهم قوي "لغة الجسد" لأنها بتوصل قوي للي قدامك، وبتأثر جداً على مدى اقتناعه بالي انت بتقوله، وخد بالك من صوتك وتعبيرات وشك، ابتسم للي بتتكلم معاه، لما توجهله كلام انطق اسمه، ومهم قوي تتواصل بالعين "التواصل البصري" يعني تبص للي معاك في عنيه وانت بتكلمه.

- الاقناع = الاحتياج، يعني وضح للي قدامك مدى احتياجه لشغلك أو المنتج الي بتقدمه، تلاقيه بشكل تلقائي جداً يتأثر ويقتنع بكلامك.

- ابعد تماماً تماماً تماماً عن الأسلوب الهجومي، لأنه ده يخلق رد فعل دفاعي عند الشخص اللي بتتكلم معاه، وبيخليه يرفض يصدقك حتى لو كلامك أو هجومك ده ليه مبررات منطقية.

- خليك مرن، اتنازل عن بعض أفكارك، ووافق على بعض كلام العميل، ده هيحسسه انك مش متشدد ومتمسك بكل آرائك، ويدفعه تلقائياً ناحية الاقتناع بباقي كلامك.

- اتكلم بشكل بسيط ومباشر، مش لازم تستخدم ألفاظ مكلكعة أو تحسس الي قدامك انك بتخترع الذرة، اللغة البسيطة والأفكار الواضحة هي الي بتوصل للناس.

- عشان تقنع الي قدامك لازم تسمع كويس، اتكلم وقول الي عندك، وبعد ما تعرض أفكارك، اسمع كويس لرئيسك أو عميلك، وجاوب عن كل أسئلته بوضوح وبساطة، مهارة حسن الاستماع مرتبطة قوي بإتقانك لمهارة الاقناع.

وفي النهاية لازم تفرق كويس ما بين مهارة "الإقناع" ومهارة التفاوض"، في الأولى انت عايز تعرض نفسك وأفكارك وتخلي الي قدامك يصدقك، لكن في التفاوض بيبقى الهدف الأساسي انك توصل لحل وسط يرضيك ويرضي الطرف التاني الي معاك.

وربنا يوفق الجميع